Сборникъ лѣтописей/Кіевская лѣтопись

◀ Лѣтописецъ

Сборникъ лѣтописей, относящихся къ исторіи Южной и Западной Руси Кіевская лѣтопись

Межигорская лѣтопись ▶

1888

II.

КІЕВСКАЯ ЛѢТОПИСЬ

1241–1621.

Кройника о разныхъ речахъ — тутъ найдешъ чого потреба.

Року 1241 татаре Подоле и Русь сплендровавши, ко Судомиру и Завифосту пришли и спалили; кроль Болеславъ, реченный Пудикусъ, съ Кракова до Угоръ утекъ, а татарове, на день пасхи пришедши, Краковъ спалили и до Сленска пришли, а подъ Врославлемъ вернулися, а другие великую Полщу воевали. А такъ Гендрикъ Пиусъ у Лекгници, люду нѣшто забравши, съ татарами зразился, немало ихъ погромилъ. Въ той часъ татаринъ указался исъ чарами, кгдыжъ на корогви была написана литера якаясь, а на верху голова чловечая зъ долгою бородою, которой зъ устъ дымъ шкаредный и смродливый выходилъ на нашихъ; зачимъ наши, здумѣвшись, ослабѣли, а татаре моцъ взяли и на голову нашихъ побили; а для.личбы у каждого трупа одно ухо отрѣзовали, и такъ десять меховъ ушю нарѣзали.

Року 1248 все духовенство ляховъ^[1] поступили своему папежу на три лѣта пятую часть своихъ доходовъ, абы имъ посту великого уменшилъ на двѣ недѣли, бо его было девять надто на тотъ часъ.

Року 1264 быдло великое и малое здыхало у Полщи.

Року 1386 Якгайло, Виленскій князь, на королевство полское обранъ, тогожъ часу и крещенъ и названъ былъ Владиславъ.

Року 1393 Витовтъ, кнежа Литовское, Орши и Витебска на Бѣлой Руси добылъ и пустившись^[2] у Киевъ и Житомиръ и Звинигородъ, взялъ подъ княземъ Володимеромъ.

Року 1394. Баязитъ ^[3], цѣсаръ турецкій, отъ Тамерляна, хана татарского, былъ пойманый и въ клѣтце замкнений и завжди былъ вожонъ, ажъ косткою рыбею самъ задавился, абы соромоты ушелъ.

Того-же часу Витовтъ, князь литовскій, стершись съ татары и килконадцать гухвовъ^[4] татарскихъ уворвавши, поймалъ и привелъ ихъ у Литву и около Вилни надъ ревою Вавою осадилъ, гдѣ и теперь мешкаютъ.

Року 1430 Витовтъ умеръ.

Року 1439 былъ Флоренскій соборъ въ Венеціи.

Року 1440 вымышлено изрядное художество: книгъ друковане.

Року 1444. Владиславъ III младъ на кролевство былъ взятъ Угорское; онъ турки колко разъ громилъ и былъ присяглъ съ турками не воеватися, але папежъ Евгеній его презъ кардинала разрѣшивъ отъ присяги и на остатокъ у Варни звытязство одержалъ, кгды неопатрно турки угонялъ, и самого тамъ забито, тамъ и поховано.

Року 1451 Царогородъ и Кгрецію турци взяли.

Року 1476 Новгородъ великій взялъ князь Московскій за Казимера короля.

Року 1486 Кнежата Сѣверскіе передались на Москву.

Року 1497 Волохове на Кузьминомъ лѣсе поляковъ буковиною много зрадливе поразили, а самъ кроль полский ледве утекъ. Тогожъ року князь Александеръ Браславль заложилъ.

Року 1507 князь Глинскій у Клецку татаръ побилъ.

Року 1508 Глинскій Заберезинского^[5] стялъ и втекъ на Москву.

Року 1509 Псковъ князь Московскій взялъ. — Князь Констентинъ на Кропивне рецѣ Москву побилъ 80 тисечей на день Рожества Пресвятые Богородицы и церковь тамъ казалъ поставити.

Року 1512. Наши на Лопушномъ татаръ побили.

Року 1514. Жикгимонтъ кроль Польскій, не малое войско выправивши такъ зъ Литвы, якъ изъ Полщи, до Вифлянтъ послалъ и оныхъ ку собѣ зголдовалъ; и теперъ подъ послушенствомъ кроля Полского суть. — Тогожъ року великій князь Московскій Смоленскъ облегъ и 12 недель добывалъ, зъ дѣлъ стрелялъ, которыхъ мѣлъ около трехъ сотъ; и взялъ Смоленскъ. Того-же року наши побили Москву на Орши.

Року 1516. У Полщи и у великомъ князьствѣ Литовскомъ лютарня попалась, которая и теперь триваетъ. Того-же року наши подъ Опочкою побиты.

Року 1519 Татаре съ поляками зрадившеся, на голову нашихъ^[6] подъ Сокалемъ поразили, а другихъ въ Бугу потопили.

Року 1520 Августъ король Польскій родился и былъ коронованъ на кролевство року 1530 и, много речей добрыхъ постановивши, въ покою кролевство рядилъ и въ Кнышинѣ живота доконалъ року 1572 Іюля 4 дня.

Року 1526 Князь Константинъ изъ иншими панами литовскими побилъ татаръ за Кіевомъ на Олшаницы реце 80 тисечей.

Року 1531. Волохи у Обертиня побиты.

Року 1535 Наши Стародубъ взяли.

Року 1536 Кокошая война была, а ничего не справили нигдѣ.

Року 1542 Была саранча великая.

Року 1543 Было на небеси знаменіе: двое сонца, двое мѣсяца.

Року 1548. Кроль старый умеръ.

Року 1549 Передмирку татаре взяли.

Року 1550 Брацлавль татаре взяли.

Року 1563. Князь Московскій Полоцко взялъ.

Року 1564. Битва Ульская была; наши Москву побили.

Року 1569. За короля Августа былъ такий голодъ великий, ажъ люди зъ голоду мерли, а звлаща въ Литве и на Полесю, а на Москвѣ еще большій былъ; въ Литве солянка жита по двѣ копы и по двадцати грошей литовскихъ была. Былъ тотъ голодъ 6 лѣтъ посполъ, скончился року 1576.

Року 1570 Морозъ жито поморозилъ въ самые цвѣты и былъ голодъ великій.

Року 1571 Въ лѣтѣ былъ такий морозъ три дни, же все збоже озимое и ярину побилъ; ажъ потомъ отросли потроше и отишли, але велми плохи, такъ, же въ мацу олыцкую по шесть и по семи копъ жита молочено. На другое лѣто по томъ голодѣ былъ моръ великій на Волынѣ, на Подоли и въ Литвѣ, и мало не всюды.

Року 1572 Августъ король умеръ.

Року 1573 Гендрикъ французъ коронованъ у Краковѣ.

Року 1574 Гендрикъ зехалъ съ королевства.

Року 1575 Елекція была у Стенжици. Татаре о святой Покрове Подоле и Волынь по самый Илвовъ и Сокалъ велми звоевали, ижъ вся Полща боялась.

Року 1576 Стефанъ, воевода Седмикгродскій, на кролевство Полское взятъ и коронованъ.

Року 1577 Татаре Дубна добывали. Наши Кгданска добывали; видячи кгданщане, ижъ не оборонитись, доброволне поддались — въ кголдъ стародавный знову поступили. Острополь заложенъ.

Року 1578 Татаре Острога добывали — царь Перекопскій съ царевичи. Подкова, воевода Волошскій, доросши лѣтъ своихъ, низовыхъ козаковъ набравши, Петрыла воеводу Волошского зогналъ, а самъ на воеводствѣ осѣлъ, за што король у Лвовѣ казалъ его стяти.

Року 1579 Полоцко взялъ Стефанъ король съ поляки, и зъ Литвою. Того-же року шелъ дождь все лѣто безъ престани.

Року 1580 Луки Великие наши взяли.

Року 1581 Пскова наши добывали и, не вземши, поеднались.

Року 1582 Папежъ рымскій свята отъ грековъ отделилъ, въ чомъ великое замешане поляковъ зъ Русью учинилъ.

Року 1585 Великая зима и весна сухая, лѣто не рожайное. Тогожъ року Белзъ погорѣлъ въ мясопустъ великій. Тогожъ року князь Василій Острожскій, воевода Кіевскій, Ярославль заложилъ.

Року 1586 Князь Александръ Констентиновичъ, сынъ воеводы Киевского, заложилъ мѣсто и замокъ Браславль.

Року 1588. Максимилианъ, цесаръ христианский, подъ Краковъ зъ великимъ людомъ притягнулъ былъ, хотечи королемъ Полскимъ быти; а коли отъ Кракова оттягнулъ, подъ Бычиною поткнулся былъ и три лета у везеню седелъ. Тогожъ року и часу Жикгимонта швецкого на королевство полское обрано и короновано.

Року 1589 Татаре спаские (sic) подъ Збаражемъ кошемъ стояли и Струса подъ Баворовомъ забили. Тогдыжъ князь Константинъ Василей, воевода Киевский, заложилъ мѣсто Переясловле на старомъ селищи.

Року 1591 Голодъ великий былъ на Подоли и въ Руси: по шесть золотыхъ былъ корецъ жита.

Року 1592 Козаки Переясловле спалили.

Року 1593 Князь Василей подъ Пяткою козаковъ побилъ и присягли ему козаки, же вѣчными часы зъ нимъ не валчить; и на знакъ того звитязства казалъ накидать три ямы великихъ и казалъ пасыпати надъ ними три курганы великихъ, которые и теперъ стоятъ.

Року 1595 Татаре, Подгоре и Покуте звоевавши, черезъ Бескидъ до Угоръ пошли.

Року 1595 канцлеръ коронный изъ жолнерами полскими, до Волохъ утягнувши, волоховъ подъ кроля полского подвернулъ и Веремия воеводу у нихъ осадилъ.

*Року 1596 Была табурщина на козаки за Переяславлемъ о семой суботѣ. Панъ Жолковский былъ гетманомъ полнымъ; взялъ тогда Наливайка, славного козака и рицера, которого у Варшавѣ кроль казалъ на мѣдянуй кобылѣ возити. Тогды конецъ сталъ Наливайковой таборщины.

Року 1598 Штось было домы, костелы, вежи, церкви попереписовало (sic) надъ домниманіе полское. Тогожъ року быдло здыхало по Подолю и у Руси.

Року 1599 и 1600 быдло на голову здыхало.

Року 1600 Поляци зъ Мигалемъ у Волосехъ потребу мѣли и потомъ, поправшисе, Мигаля прогнали и землю Мултянскую подъ себе подбили.

Року 1603 Ишла саранча месяца Августа 16.

Року 1604 При великомъ короли Жикгимонте, а при воеводе Киивскомъ, князи Василии Острозскомъ оказался якийсь царъ; першей былъ въ Печерскомъ монастыри чернцомъ, полрока никто его не зналъ, а пришолъ зъ Волыни, не знать откуль; потомъ пошолъ до князя Адама Вишневецкого, до Брягиня, тамже скидалъ платие чернецкое; князь Адамъ оздобилъ его по царсву уборами и прославилъ его царемъ Московскимъ и удалъ его до кроля. Кроль, му додавши вѣры, пустилъ его на Москву и при немъ пустилъ воеводу Сандомирского и пана Ратомского, старосту Острицкого, и иныхъ пановъ много. Который ишолъ гойне, яко царъ; приставало до него панства много. Пришолъ до Киева октебрія 7 дня, былъ въ Киеви две недели, стоялъ у Олехновича бурмистра, пошолъ на Вышегородъ и шолъ до Путивля. Вышолъ съ Путивля мая третего 1605 року. Тогожъ року сѣлъ на царстве и коронованъ заразомъ, а за якимсь забуренемъ забыто его року 1606, мая 9 дня.

Року 1608 месеца Февраля 13 дня преставися благовѣрный и христолюбивый князь Василий Острожский, воевода Киевский, которий пасѣялъ рускую землю книгами святыми вѣры православной; мѣлъ и друкарню у Острозѣ и школы философскія языкомъ греческимъ, и латинскимъ, и словенскимъ. Которого тѣло положено у Острозѣ, въ церкви святого Богоявленія. Жилъ на свѣтѣ лѣтъ 82.

Року 1609. Панъ Жолковский, гетманъ великий, наехалъ на воеводство Киевское. Тогожъ року и церковъ Святои Софии отстала отъ службы; не почали священники до неи со кресты ходити и службы Божеи отправовати, прето, ижъ митрополитъ Ипатий присталъ до костела римского и приказалъ былъ тамъ священникомъ киевскимъ за себе Бога просити; але не получилъ того, хотяжъ зажили працы и кошту до двору королевского; за шчо тежъ и онъ самъ отъ Бога былъ навѣженъ злою хоробою и зле живота доконалъ у Володимери. Позвалъ поповъ мандатомъ на трибуналъ, да самъ и справъ своихъ не попиралъ. А предъ нимъ былъ митрополитъ Михайло Рогоза; той былъ началникъ тои болести^[7]; найпервей прислалъ тутъ до Киева врядника своего, именемъ Янъ Хрушинский — щырый ляхъ, чого передъ тымъ николи не бывало, которий хотѣлъ поповъ судити и задавалъ трудности попамъ о послушенство. Теды и того явне Богъ скаралъ: гды жена его сытила медъ къ Рожеству Пресвятои Багородици, хотѣла мѣти поповъ въ себе на обѣде ведлугъ давного звычаю и мѣла сполечность^[8] показувать костела римского исъ церковю восточною, але не допустилъ котелъ:

Пришла до него сыты гледѣти,
Але мусила въ немъ и долго сидѣти,
Ажъ и очи еи не стали гледѣти.
Бо и сама скипѣла.

Такъ и той далъ покой.

Року 1610 знову одозвався тотже Дмитръ Ивановичъ царь Московскій, скупивши войска полского, которое зобрано было на рокошъ противъ его кролевское милости теперешнего Жикгимонта третего, вторгнулъ до земли Московское подъ Новагородъ, маючи поляковъ тисячей десять, надъ которымъ войскомъ полскимъ былъ старшимъ гетманомъ панъ Меховицкій; потомъ Шуйский, царь Московскій, зо всего панства своего скупилъ люду военного напротивко царя Дмитра Ивановича тисячей 180, при которомъ войску былъ старшимъ братъ царя Шуйского; а при цару тежъ Дмитру по пану Меховицкомъ былъ гетманомъ князь Романъ Ружинскій. На тотъ часъ войска нашого: поляковъ и козаковъ запорозскихъ такъ тежъ и донцовъ всего было тисячей пятнадцать. Споткалъ се князь Ружинскій зъ братомъ царя Шуйского подъ местомъ Болховомъ и поражена есть москва презъ поляковъ, козаковъ и донцовъ, где воевода Болховский самъ и зъ местомъ и зъ замкомъ цареви Дмитру поддалсе; царя Ивана Шуйского братъ зъ остаткомъ войска своего вшолъ под столицу и положилсе зъ войскомъ отъ столици полмили надъ рѣчкою Ходынкою, а царъ Дмитръ съ княземъ Ружинскимъ, притягнувши на реку Москву подъ Тушинъ зъ войскомъ, отъ столици миль полторы; тамже въ ночи князь Ружинский съ поляками зъ розныхъ сторонъ ударили на таборъ Шуйского и розгромилъ таборъ, здобычъ немалую одержалъ, хочъ троха съ столици москву посилковано, але царъ Шуйский болей таборомъ не сталъ, замкнувшисе зъ людомъ до столици и болей въ поле битвы не хтелъ чинити; зачимъ поляки подъ моцъ все царство Московское, окромъ столици и места Смоленского, все опановали и мели то въ моци своей летъ три; потомъ Шуйский, бачечи ижъ съ царства Московского отпору полякомъ дати не могъ, выправилъ Скопина, давши му килка сотъ рублей, до великого Новагорода, а оттуль до Немецъ, затегаючи немцовъ; где затегнулъ войска немецкого пехоты и езды тисячей десять. Въ томъ же часе его кролевская милость, теперешний Жикгимонтъ третий Смоленского замку добылъ и войско Скопиново знесъ; жолнеромъ тежъ, которые цару Дмитру служили, заслуженое поднялсе платити, якожъ за конфедарациею отъ жолнеровъ заслуженое жолнеромъ дошло. Царъ Дмитръ, видечи, же его войско полское отступило, въ маломъ войску зъ донцами до Калуги зъ Заруцкимъ отъ столицы одышолъ; тамже сынъ царя Касимовского, татаринъ, въ поли, мстечисе забитя отца своего, оного царя Дмитра забилъ; потомъ Заруцкий царевую Дмитрову за себе взялъ съ потомкомъ, сыномъ царя Дмитра. Потомъ Москва оного Заруцкого добыла и на косы въ яму живого вкинула, а сына царя на шолковомъ шнуре обвесили; самую тежъ царевую до монастыра Покровы Пресветои Богородици въ месте Суздалю постригли. А съ королемъ его милостю Жикгимонтомъ третимъ примире учинили на четырнадцать летъ, поступивши князство Смоленское и Черниговское зо всими местами приналежными, въ року идучомъ, тисеча шестъ сотъ двадцатомъ. О чомъ ширей о войне Московской, которая тривала въ земли той мало не двадцать летъ, чительникъ найде у кронице полской, которая въ рихломъ часе выдана будетъ. Отсылаю, а чогомъ былъ отъ летъ трохъ у той земли сведомъ, томъ коротко написалъ.

Року 1611 месеца Июля 3 дня кроль Жикгимонтъ взялъ Смоленскъ зъ недели на понеделокъ.

Року 1612, месеца апреля 19 дня, на паметь преподобного отца нашего Иоана вѣтхия лавры освещенна бысть церковь светого Спаса^[9], а светого Петра и светого Николы у манастыри Межигорскомъ при игуменѣ Афанасіи архиепископомъ^[10] зъ Кгрецѣи; и много народу было зъ мѣста Киева и зъ иныхъ мѣстъ. Тогожъ року и тогожъ месеца 23 дня на день светого великомученика Георгия той же архиепископъ осветилъ церковь светои Троици, въ ней же придѣлъ светого Кирилла^[11] при игумене отцу Василии^[12] Красовскомъ, прозываемомъ Чернобровцѣ.

Року 1613 месяца ноября 3 дня на память святыхъ мученикъ Акипиксимы и презвитера Иосифа громъ гремевъ и дождь былъ сильный и зъ великимъ страхомъ на 16 године.

О церкви Соборной мурованой, иже въ Кіевѣ стоитъ на Подолѣ, якъ поправлена на старомъ фундаментѣ^[13].

Первого початку старого нигдѣ у кройникахъ не обретохомъ, токмо сей антиминсъ на томъ-же престолѣ старомъ, сице подписаный: „Осветися алтарь Великого Бога и Спаса нашего Исуса Христа, Пресвятыя Богородицы честнаго Ея Успѣнія преосвященнымъ архиепископомъ и митрополитомъ Киевскимъ и всея Руси Мисаиломъ, при великомъ короли Казимери; и положенъ бысть здѣ въ лѣто 6901, индикта 6, марта 20 дня, на паметь преподобнаго отца нашего. Исака Лѣствичника“.

О поправе на старомъ фундаментѣ: Изъ обычнего всемогущого милосердия Спасителя нашего Бога, найпаче же нынѣ за нашихъ роковъ посети насъ благостию своею, аще и мало что отъ нашихъ исправленій; но помощъ и молитвы святыхъ древнихъ Богоносныхъ отецъ о насъ дѣствоваша ко Богу, и наше прошеніе не бысть тощно. За фортунного^[14] панованя наяснѣйшого господаря, пана нашого, великого короля Жикгимонта, а за держание^[15] воеводства Киевского велможного его милости пана Станислава Жолковского, а во отступленіи митрополитовъ Киевскихъ вдовствующи митрополии Киевской, понеже они въ то время вси уклонишася во купе ко западу; мыжъ, оныхъ мерзость возненавидѣвше, наслажаемся пророческихъ словесъ, глаголющихъ: „Отъ Сиона изыде законъ и слово Господне, изъ Ерусалима, а не зъ Рима“! Въ то же время въ освещенныхъ киръ патриарха Констентенополского Тимофея, а здѣ, во Богоспасаемомъ граде Киеве, всихъ обще живущихъ православныхъ христианъ, сыновъ святыя восточныя церкви, присныхъ во вѣре, найпаче же пана войта Деонисия Балыки, а по немъ наставлъшего войта, пана Федора Ходыки, а за бурмистра пана Созона, сына тогожъ войта Балыки.

Року 1613, месяца апреля 15 дня, на паметь святыхъ апостолъ: Трофима Пуда, Аристарха, за привилиемъ наяснѣйшого господаря нашого, великого короля Жикгимонта, а за благословениемъ вышмененного патриархи Тимофея, почали съ фундаменту поправлять церковъ Пресветои Пречистое^[16] Успѣнія соборную, стоячую въ рынку мѣсте Киевскомъ, внутри и зъ надворя, бо ошарпалася была велми^[17] и розвалялась: верху всего не было. Старый муръ по вышние окна збивши, весь верхъ на ново змуровали: самую баню и тые четыре бани около неи знову робили; бо прежде тыхъ малыхъ бань не было, толко было дошчками покрыто. А поправлялъ тую церковъ майстръ зе Влохъ, Савостиянъ Брачъ. Почали месяца мая 13 дня; на Возносение Господне выношено все исъ церкви и вси обрады церковные: почали исъ середины робити зысподу и заробили болшую баню месяца сентебря 4 дня на паметь светого мученика Вавилы; тогожъ месяца 21 дня у вовторокъ поставили и крестъ на церкви, тойже таки, што и прежде былъ, але позлотили знову; месяца октебря 1 дня домуровали и остатней бани на рогу отъ урмянское церкви. Тогожъ року декабря 5 дня на паметь преподобного отца Савы почали служити всенощное и службу Божію и служили презъ всю зиму, же нелзе было зимою робити майстромъ ажъ до недели мироносицъ; и опять вси обрады были выношены до Воскресения Христова зъ церкви, и презъ тое лѣто робили, и доробили за помочю Божиею месяца августа 14 дня, и образы постановили, и почали служити ажъ и до днесь. Обретохомъ въ кройнице, ижъ первѣй того сия божественная церковъ была изнищона и ободрана, все побрано: сребро и злато, кресты и иконы полуплены и попалено все отъ поганого царя Перекопского^[18] Мендикгирия и отъ нечестивыхъ его агарянъ. А былъ приставомъ и дозорцою до тои работы панъ Сызонъ Балыка, упрошоный отъ всего мѣста. Да не возми нихто сихъ словъ ложю, но вѣруй, истина бо есть все; и азъ недостойный во иереохъ, Кирило Ивановичъ, на тотъ часъ будучи мнѣ уставникомъ при тои цервви, огледахъ все очима своими, написахъ достовѣрно. А сама церковъ увышки отъ земли до самого верху болшей бани 30 локоть и 3 локтя и чверть локтя.

А въ то время въ томъ же богоспасаемомъ граде Киеве быша служители священницы светыхъ церквей: Василей Матеребозский. Мина Притисский, Иоанъ Воскресенский, Никита Спасский, Климентей Наберезский, Михайло Борисоглѣбский, Климентей Рожественский, Матфей Доброниколский и дияконъ Демянъ. А вси тые вышей мененые свещенники, каждый неделю^[19] свою служили въ тои церкви соборнои светои Пречистое, за господаря короля Господа Бога просили и за пана воеводу Киевского и за ктиторовъ, и за всихъ православныхъ християнъ; а оны за тое отъ господаря короля и отъ пана воеводы Киевского и наместниковъ его тымъ были пожалованы тогда и въ потомные часы, жебы отъ мятежныхъ и бурливыхъ на церковъ Божию еретиковъ во вшелякомъ покою на тотчасъ мешкали, и отъ вшелякихъ подачокъ, и отъ наѣздовъ, и станций околичныхъ, и войскъ, и отъ самого пана воеводы жебы были волны.

Року 1614 месяца февраля 26 дня исъ четверга на пятницу на паметь светого отца Василия преставися той чесный отецъ игуменъ Василей Чернобровка, а погребли его марта во третий день на сырной недели и положили тѣло его честное подъ муромъ, подле правого крилоса, подъ стеною, со честию великою.

Року 1615 месяца июня 14 дня исъ середы на четвергъ у Печерскомъ монастыри у церкви зостался злодей, хотячи окрасти церковъ, а коли, у въ олтари скрывся, взялъ изъ жертвенника сребряный котелецъ и иные сосуды побралъ, и за пазуху заклалъ, и пошолъ зъ олтаря до образа Пресвятои Богородицы, хотячи оборвати килко чирвоныхъ было тамъ на образе, але нѣякая божественная невидимая сила возбрани ему, килко разъ ударило его о землю отъ образа, елико хотѣлъ, паки его било; и такъ, ушедши у въ олтаръ и оцепенѣвши, лежалъ подъ пекелкомъ, где огонь держатъ, ажъ его пономаръ на заутрей тамъ нашелъ, и такъ оный злочестивый все исповедалъ, што ся надъ нимъ чинило.

Року 1617^[20] при великомъ короли Жикгимонте, а при пану воеводе Киевскомъ, Станиславу Жолковскомъ, стараніемъ и накладомъ^[21] пановъ мещанъ Киевскихъ: на тотъ часъ пана войта Федора Ходыки и пана бурмистра Матфея Мачохи и всего посполства места Киевского, скопали гору Уздыхалницу, которая стоитъ предъ замкомъ Киевскимъ, и еще знать; а скопано еи полшеста сажня добрыхъ у звышки и нашли тамъ печерку сажней трехъ у гору глубоко а въ ширъ сажня; и нашли въ неи горщикъ ни щимъ^[22] а большей ничого, и написано на стѣнѣ имя: „Павелъ“; знать же то колись^[23], былъ пустелникъ.

* Року 1618 месеца февраля 15 козаки запорожскіе на Зверинци офиціала митрополичего, а по нашему протопопу, который былъ посланъ отъ митрополита Ипатія Потѣя до Киева на протопопство, Антонія Грековича, родомъ зъ Рогатына, который присталъ до римского костела и хотѣлъ увязатися у монастыръ святого Михайла Золотоверхого, поймавши козаки тамже, противъ Выдубицкого подъ людъ подсадили воды пити.

* Року 1620 Подкало носчате отъ неприятелей нашихъ пановъ коронныхъ у землѣ Волоской, межи которыми было: найпервей панъ Жолковскій, гетманъ коронный, которого поймайвши татарове, голову его оттяли и на взгарду нашимъ панамъ сынъ его власный предъ войскомъ татарскимъ на копіи носилъ; а потомъ послали до свого царя голову оную. Тамже поймали живыхъ: князя Корецкого и пана Струса и иныхъ пановъ зацпыхъ не мало и поведено ихъ въ землю Турецкую.

* Тоижъ осени, октеврія 29 дня, 18 годины дня было трясеніе землѣ на еденъ часъ.

* Тогожъ року, месеца ноембрія 5 дня у Варшавѣ на сейму, у костелѣ якийсь панъ Пекарский ударилъ короля Жикгимонта наджакомъ у лобъ, але похибилъ трохи, подобно зъ страху, еднакъ плазомъ по щоцѣ ударилъ, ижъ кроль упалъ зъ того пуду; заразъ кролевичъ Владиславъ припалъ и оного зрайцу тужъ, въ костелѣ, шаблею поранилъ, але не дано ему забити оного.

Въ лѣто 7128, а отъ Рождества Христова 1620, месеца марта въ 22 день приѣхалъ зъ Москвы изъ самои столицы святѣйший патріархъ Іерусалимский, именемъ Феофанъ, до Кіева и сталъ у монастырѣ Братскомъ и былъ принятый зъ великою честію отъ духовныхъ и отъ свѣцкихъ людей; на другий день приходилъ до соборнои церкви Успенія пресвятои Богородицы. Месеца Априля въ 9 день служилъ службу Божію въ церкви соборной и съ нимъ протосиггелъ патріарха Константинопольскаго и священники Киевскии значное отправовали набоженство; и былъ у Киевѣ презъ часъ немалый, презъ все лѣто, а съ Киева выехалъ до Трехтемирова до монастыра козацкого, и тамъ былъ часъ не малый. Потомъ провадили его козаки до землѣ Волоскои и тамъ отдали его господару Волоскому Александру. Въ томъ же року, месеца септеврія 3 дня, отежчаючи съ Киева святѣйший патріархъ, положилъ клятву на Рудского, митрополита Киевскаго, который былъ подъ унѣю костела римского, а вмѣсто его поставилъ и посветилъ на митрополію Киевскую человѣка годнаго и честного, именемъ Іова Борецкого, у письмѣ словенскомъ, и кгрецкомъ, и латинскомъ ученого и зъ нимъ чотырохъ епископовъ на рознии мѣста: Мелетія Смотрицкаго на епископство Полоцкое, Ісаю Копинского, инока святобливого монастыря Печерского, на епископство Перемыслское, Паисія Ипполитовича на епископство Холмское и Белзское, Іосифа Курцовича на епископство Володимерское.

* Року 1621, генваря 13, 8 годины дня передъ вечеромъ указалося на небеси знаменіе: на полуденной сторонѣ три слонци и три дузѣ кривавыхъ: одна рогами на сѣверѣ, другая на полудень. Знать то войну и кровопролитіе значило.

---

Коротко тежъ напишу, што се деяло за веку мого.

Року прошлого 1618, месеца листопада, зъ дня на ночь тридцатого, указалосе дивное видение на небе, которое кометою албо звездою злучою зовуть; кгды такая звезда была въ року 1500 видена, стало се презъ моръ въ Немцахъ гневъ Божий неслыханый, же товаръ и люди поветриемъ были караны. Ведомо тожъ то всимъ съ писма кроничного, што року тисеча пятсотъ семдесятъ семого сталосе по такои звезде? якое крови розляние, якое было великое людей мордованіе праве въ тотъ часъ въ царствѣ Московскомъ? Одно Богъ ведаетъ якъ много войною презъ мечъ и огонь людей погинуло; не одинъ тамъ городъ, место, поле кровию сплынуло; о Полщи нижей напишу, якъ се по той комете стало; читай тежъ писмо светое, найдешъ тамъ розумомъ своимъ справы, которые заховалъ Господъ Богъ вѣрнымъ своимъ. Южъ у кроникахъ полскихъ, русскихъ читаемъ, же ледве зъ матки своее дитя на светъ отворило ворота зъ живота, „татарове едутъ“ закричало; и также правдою тогожъ року стало, же по всей Полщи землю спустошили вширъ и надолжъ и назадъ вцале вернули. Въ останку вечная мудрость нехай о насъ радитъ, а штомъ тутъ написалъ, верь ми, же не завадитъ.

Въ року 1620, мая 13 дня, светейший патриархъ Ерусалимский, киръ Феофанъ, черезъ землю Московскую до Киева прибылъ. Для певное ведомости и копию зъ листу, отъ короля его милости до превелебного отца патриархи Ерусалимского писаного, который на езыкъ руский переложеный такъ се въ себе маетъ: „Жикгимонтъ третій, Божию милостию кроль Полскій, великій князь Литовский, Руский, Пруский, Мазовецкій и далей. Велебный, побожне намъ милый! Предъ килка месецей далисмы листъ нашъ до велебности вашои, презъ который охотне жаданю велебности вашои зложилисми и для тое самое причины коморника нашого, абы велебность ваша тымъ безпечней презъ кролевства нашого панства пожаданый преездъ одержалъ; а мы напротивъ посполитого однакъ того всего хрестиянства неприятеля, жебы се зъ звитезства не надымалъ, такое войско збираемъ, которымъ бы за помочю Божю наездомъ его отпоръ учинити се могъ; якожъ и теперъ заразъ войску нашому Запорозскому напротивъ посполитого того неприятеля, яко наскорей, выходить и у вочи ему стануть роскажемы; злетили мы тежъ послови нашому, абы велможность вашу наведилъ и то именемъ нашимъ преложилъ, абы велможность ваша, ведаючи, же не толко о наше кролевство, ала о все хрестиянство иде, войску запорозскому до того причиною былъ, абы воли нашои поволнымъ и послушнымъ ставилосе; въ которои справе ширей зъ велебностю вашею послови нашому, урожоному Бартломею Обалковскому, мовити злетилисмы; которому велебность ваша веру зуполную даси и въ томъ во всемъ до воли нашей, яко назычливей, склонишъ; притомъ велебности вашей здоровъя и всякое помыслъности зычимо. Данъ зъ Варшавы, дня 10 месеца листопада, року 1620, панованя нашого полского 23, шведского 26 року. Sigismundus rex.

Кгды вже съ Киева тотъ же Феофанъ, патриархъ Ерусалимскій, рушилъ, уже праве подъ самый часъ съ панства короля его милости выезду своего, презъ тогожъ его милости пана Обалковского листъ свой до войска Запорозского, водлугъ воли и листу его кролевское милости, греческимъ языкомъ натерминованый, а на русскій языкъ преложоный и посланный, написалъ такий: „Феофанъ, зъ милосердя Божого патриарха Иерусалимскій, Божего мѣста Сиону, Сириеи, Аравиеи, Кана Галилеи, зъ оное стороны Иордана и всее Палестины. Гетманови, полковникомъ, сотникомъ, асавуломъ, атаманомъ и всему зацному и презнаменитому войску Запорозскому ласка отъ Бога вседержителя и отъ Господа нашого Исуса Христа и благословение живота дающого гроба Божия и светого Иякова апостола, брата по плоти Господня, хрестиянского першого архиерея, и нашего смирения нехай будетъ на веки аминь.

Презацный и преславный пане гетмане и преложоные войсковые все прехраброе рыцерство, сынове въ духу покорности нашей умилованые! (неразобрано одно слово) добре и росказане пренаяснейшого короля, пана вашого, до насъ не доходило, теды вы сами, погледаючи частю на повинность вашу рыцерскую; частю на кгвалтовную потребность отчизны вашое, то штобы зъ васъ ремесло ваше рицерское, которымсе однымъ зъ давнихъ вековъ вы и продкове ваши бавилисте, вытегало, теды подъ неприятеля Божого и хрестиянского, на панства пренаяснейшого короля, пана вашого, кривавый наступъ чинилибысте охотне, пренаяснейший кроль, панъ вашъ розсказуе вамъ, яко завжди вернымъ и послушнымъ подданнымъ своимъ, бо кгвалтъ отчизне вашей отъ головного хрестиянского неприятеля, которого ярма неволи турецкое есть великое; теды король его милость по васъ того потребуе, абы се готовими зо всею охотою и зо всею силою вашою на тую послугу, на которую васъ презъ посла своего, его милость пана Бартломея Обалковского, который и намъ отъ пренаяснѣйшого короля листъ отдалъ, затегаетъ, росказуетъ ставили, презъ што у пренаяснейшого короля, пана вашого, на ласку ку собе панскую значне заделаете, и мне за васъ и за все войско ваше богомолцу уставичного знать будете, и отчизне въ часъ потребы на помочи станете, и славу войска вашого значну отнесете и за тую, поднесеную презъ насъ у светои церкви вашои рускои, херархие, митрополита знову и епископовъ, на местце отъ светое апостолское Костентинопольское, албо Цари-городское столицы отпалыхъ, на тое местце благочестивыхъ и отъ насъ посвещеныхъ консенсемъ своимъ королевскимъ и привилями змоцнитъ и обваруетъ; о што пилно а пилно наяснейшого короля, пана вашого, пилными прозбами вашими старатсе маете. А мы, якъ за тое презацное кролевство, такъ за наяснейшого короля Полского и за все кролевство его, сенатъ и за васъ, славное войско Запорозское, Господа Бога тутъ и на всякомъ местцу владычества его и у гробу Божого, если насъ до столицы нашей Господь Богъ здорового донесетъ, просить не перестанемы. За тымъ и повторе ласка и покой Божий и благословенство смиренія нашого нехай зостане зъ милостію вашею — Аминь.

Данъ зъ монастыра Терехтимирова, року отъ сотворения света 7129, а отъ воплощения Сына Божия 1621, месеца стычня 7 дня, индикта 4“.

Такимъ листомъ своимъ до войска Запорозского светый отецъ патриарха Ерусалимский на писане короля его милости ставилъ; тымъ засе полковникомъ, сотникомъ, которые завсегда при немъ были, тоежъ а не иначей частокротъ отцовско персвадовалъ, албо мовилъ. А особливе однакъ пану Петрови Кунашевичови Сагайдачному, который его за универсаломъ короля его милости позволенемъ, а за войсковымъ росказанемъ зъ выборнымъ люду рыцерского полкомъ ажъ до Волоское границы провадилъ и нашимъ сотникомъ и молодцомъ подъ тотъ часъ, кгды уже зъ ними на границы разежчалъ, до цалованя руки его прибылымъ, передъ собою мелъ, широкими словы черезъ тлумача мовилъ, абы се ярма поганского, которого указовалъ быть хрестияномъ тяжко и неизносно, пилно стерегли, абы милую отчизну свою, а въ ней и самихъ себе, чуле боронили, упоминалъ и просилъ.

Въ року 1620 дня 29 паздерня тресение земли было на чверть годины зекгаровой, предъ вечеромъ годинъ две.

Въ томже року 1620, дня 9 грудня по заходе слонца страшное затмение месяца было, которое было годинъ две.

Въ томъ же року 1620 дня 4 паздерня короля его милость теперешнего, Жикгимонта третего у Варшаве, кгды входилъ до костела, неякий Пекарский шляхтичъ зъ за дверей костельныхъ короля его милость чеканомъ обухомъ въ голову вдарилъ; розрухъ барзо великий былъ въ месте; удавано, же татаринъ короля его милость забилъ. Потомъ за тотъ злый учинокъ оного Пекарского срокгою мукою страчено.

Въ томъ же року и месецу сеймъ у Варшаве зложено, на которомъ уфалено войну напротивъ султана Османа, цесаря Турецкого посполитымъ рушенемъ и поборомъ.

Въ томъ же року 1621 въ рицерскихъ справахъ досветченый его милость князь Семенъ Михайловичъ Лыко на подстароствѣ Черкаскомъ, который не былъ преконаный боемъ, але презъ чаровницу тамъ же въ Черкасехъ съ тымъ се светомъ пожегналъ, где забавы и некоторые справы рицерские виршами коротко выписую, чого самъ, при боку его будучи, почасти естемъ сведомъ:

Бо то есть дорогий обычай рицера жаловать
И смерть его своею смертию откуповать;
Такъ чинили оные валечници,
Купуючи Гектора зацного Троянчици:
Золото взаемъ ваги поступили
Тело оное мужне великимъ коштомъ чтили;
Въ кождомъ то давномъ рицерскомъ народе
Мужа до бою золотой даровали свободе
И его рицерские поступки оферовали,
Богу несмертелному за него дяковали.
Такого вожа зыскало российское племе —
Дорогой карбункулъ неошацованое цене,
Зацна кровъ мужного князя Лыка кости
Рыцеръ неошацованый жалости
Князь Семенъ Лыко, вожъ делный,
Цнотъ, уместности и скромности полный.
Егды за его приводомъ замокъ Московскій Белгородъ добывали,
Кгды презъ штурмъ и бой добылъ места и замку, где войско здобывало.
Скарбу немало; потомъ збурилъ Рылскъ, Путивль
Съ подивенемъ всихъ, яко оный князь былъ такимъ рыцеремъ,
Кгды се тежъ на Муравскихъ шляхахъ съ татарами потыкалъ:

Такъ, яко се биютъ воды о скалы
Такъ се князя Лыки войско съ татарскимъ зошло,
Не великостю але моцю его прошло;
А самъ межный князь почалъ своимъ продвовати,
Побивши татаръ, почалъ щасливе триумфовати:
Зачимъ отъ Москвы и отъ Татаръ упокоилъ Украину; тымъ
Зророве людей и местъ Украинныхъ обваровалъ своимъ.
Такую моцъ тотъ зацный мужъ въ словехъ у силе
Мевъ вдячный рицерству и отчизне миле;
Кгды се съ послугою своею где поспешилъ,
Великою учинивши корысть всихъ тешилъ,
Або военымъ способомъ векъ свой увесь травилъ,
Въ поляхъ дикихъ коло шляховъ Муравскихъ татаръ длавилъ.
Часомъ отъ зною, то отъ горачности
Опрочъ хлеба потравъ и безводной млости
Тымъ способомъ веку онъ молодого зажилъ
И рицерской дельности такъ набылъ
Самъ тежъ щасливе въ Олександрове премешкивалъ,
Потехъ своихъ зъ великою радостю заживалъ^[24].

.

.

.

.

.

.

.

.

.

.

.

.

.

.

---

__________

1. Сб. Кощ. — римское.
2. Сб. Кощ. — оттоль пошолъ.
3. Въ подлинникѣ: Боязскій.
4. Сбор. Кищак. — юртъ.
5. Въ подл. Заборинского.
6. Сб. Кощ. — Русь.
7. Въ сбор. Кощ — ереси.
8. Сбор. Кощ. — едность.
9. Сборн. Кощак. — Преображенія Господня.
10. Сборн. Кощак. — Монемвасійскимъ зъ Кгреции, або Неофитомъ Болгарскимъ.
11. Сборн. Кощак. — Набольскаго.
12. Сборн. Кощак. — Варсонофію.
13. Это отдѣльное сказаніе помѣщено въ лѣтописи съ сохраненіемъ отдѣльнаго заглавія, которое написано киноварью.
14. Въ Сборн. Кощ. — щастливого.
15. Сборн. Кощ. — владѣіемъ.
16. Въ сбор. Кощ. — Богородици.
17. Въ сбор. Кощ. Кгдыжъ была велми опала.
18. Въ сбор. Кощ. — татарского.
19. Въ сборн. Кощ. — седмицу.
20. Въ Сбор. Кощ. — 1616.
21. Въ Сбор. Кощ. — коштомъ.
22. Въ Сборн. Кощ. — порожній.
23. На словѣ колись прекращается лѣтописный сводъ въ рукописи А. М. Лазаревскаго; дальнѣйшій текстъ заимствованъ изъ списка, принадлежащаго рукописному отдѣленію библіотеки института Оссолинскихъ.
24. Въ этомъ мѣстѣ прерывается рукопись, принадлежащая А. М. Лазаревскому послѣдніе листы рукописи этой утеряны. —

Ця робота перебуває в суспільному надбанні в усьому світі. Цей твір перебуває в суспільному надбанні в усьому світі, тому що він опублікований до 1 січня 1929 року і автор помер щонайменше 100 років тому.